In su xelu coronada

Cali stella luminosa

Rit.: Santa Barbara gloriosa

Siais de nosu abogada.

In tempus de idolatrìa
Regnendi Massomilianu
Nascis de babbu paganu
Bràbara in Nicomedia.
De santidadi e de ghia
Ses de xelu mandada.
Santa Bàrbara...

Is gentilis potestadis
Bolint anzis chi adoris
Cum incensu e onoris
Is falsas divinidadis,
Ma de is impias voluntadis
Ses nemiga declarada.
Santa Bàrbara...

De manera prodigiosa
Su battismu has arricìu
Su coru tuu s'est unìu
A Gesus, càndida sposa:
ses bella e mìstica rosa
de tott'is donus ornada.
Santa Bàrbara...

Su romanu presidenti
Ingannau in sa speranza
De Ti binci sa costanza,
òrdinat subitamenti
chi sìast barbaramenti
in pùbblicu flagellada.
Santa Bàrbara...

In turri t'hadi inserrau
Babbu tuu po vanidadi:
sa Divina Trinidadi
innì tui has professau,
de su Verbu incarnau
s'alta dottrina sagrada.
Santa Bàrbara...

Nienti serbit su portentu:
avvertit su paganu
Diòscuru prus insanu
Cum furori violentu,
a sa filla in d'ù momentu
donat morti cum sa spada.
Santa Bàrbara...

De fidi, puresa tali
No est digna prus de sa terra
Po custu ti movi gherra
Sa podestadi infernali:
bolit chi sposu mortali
pighis, Vèrgini sagrada.
Santa Bàrbara...

Ma su xelu est infuriau
Po delittu tant'orrendu
S'oscurìu est tremendu :
Unu raiu est abbasciau,
Abarrat su babbu abbruxiau,
De s'innocenti svenada.
Santa Bàrbara...

E a is peis de Marianu
Po ti privai de sa vida
Diòscuru parricida
Ti trascinat disumanu
Bolit cum furori umanu
Sìais a morti cundennada.
Santa Bàrbara...

Protettora salutari,
Benèfica in tott'is logus
Ses de raius e de fogus
E perìgulus de mari
Cum effettus singularis
In s'universu acclamada.
Santa Bàrbara...